Nooh Narvi
maana ki mira dil bhi jigar bhi hai koi chiiz
lekin vo nazar tir-e-nazar bhi hai koi chiiz
mumkin nahin vo chahne valon ko na chahen
iḳhlas-o-mohabbat ka asar bhi hai koi chiiz
luT jaa.e ki rah jaa.e rah-e-ishq-o-vafa men
dil bhi hai koi maal jigar bhi hai koi chiiz
un se jo na uTTha tha use is ne uThaya
qaa.il hain mala.ek ki bashar bhi hai koi chiiz
chhupne ke liye shauq se parde men chhupen aap
itna rahe ma.alum nazar bhi hai koi chiiz
ye kasrat-e-azar-o-gham-o-ranj kahan tak
ai shaam shab-e-hijr-e-sahar bhi hai koi chiiz
kahte ho ham a.enge magar zulm karenge
socho tum agar to ye magar bhi hai koi chiiz
baaqi na rahi navak-e-dil-doz ki hajat
zalim tiri sidhi si nazar bhi hai koi chiiz
naale se kahunga ki pahunch arsh-e-barin tak
ab tez musafir ye safar bhi hai koi chiiz
betab udhar aap pareshan idhar ham
aapas ki mohabbat ka asar bhi hai koi chiiz
chalti hui mere dil-e-betab ko le kar
lakhon men vo duzdida nazar bhi hai koi chiiz
be-kar na ja.ega mire dil ka taḌapna
naala hai koi shai to asar bhi hai koi chiiz
ankhon ke liye zauq-e-nazar bhi hai koi baat
pahlu ke liye dard-e-jigar bhi hai koi chiiz
allah re tire husn-e-ziya-bar ka jalva
ye pesh-e-nazar ho to nazar bhi hai koi chiiz
ai ‘nuh’ shab-e-mah men paas us ko biTha kar
kahta huun mira rashk-e-qamar bhi hai koi chiiz
Leave a Reply