Kaun Se the Wo Tumhaare Ahd Jo TuTe Na The

Qamar Jalalvi

kaun se the vo tumhare ahd jo TuuTe na the

ḳhair in baton men kya rakkha hai tum jhuTe na the

baghban kuchh soch kar ham qaid se chhuTe na the

varna kuchh paanv na the be-kar par TuuTe na the

ḳhaar jab ahl-e-junun ke paanv men TuuTe na the

daman-e-sahra pe ye rangin gul-buTe na the

rah ga.i mahrum azadi ke naghmon se bahar

kya karen qaid-e-zaban-bandi se ham chhuTe na the

is javani se to achchhi thi tumhari kam-sini

bhuul to jaate the va.adon ko magar jhuTe na the

us zamane se dua ki hai baharon ke liye

jab faqat zikr-e-chaman-bandi tha gul-buTe na the

kya ye sach hai ai mire sayyad gulshan luT gaya

jab to mere samne do phuul bhi TuuTe na the

chhoḌ to dete the raste men zara si baat par

rahbaron ne manzilon par qafile luuTe na the

kis qadar aansu baha.e tum ne sham-e-gham ‘qamar’

itne taare to falak se bhi kabhi TuuTe na the