rahne ko sirf jism tha zer-e-zamin raha
jo kuchh tha mere paas yahan ka yahin raha
logon ka kya hai un ka ravayya yahi to hai
aisa nahin raha kabhi vaisa nahin raha
ho mushkilon ka daur ki ḳhushiyon ka silsila
har haal men mujhe to usi par yaqin raha
dil men hi rah ga.i hai talab us ke diid ki
parda-nashin to aaj bhi parda-nashin raha
us ko baḌa ghurur tha mastana chaal par
Thokar lagi phir aisi kahin ka nahin raha
avargi ne saath nahin chhoḌa umr-bhar
main aur mera zehn kahin dil kahin raha
jitni kahaniyan thiin faqat raston ki thiin
manzil pe aa ke lutf hi baaqi nahin raha
milne ki aas aḳhiri-dam tak bani rahi
be-jan jism tha mira zinda yaqin raha
Leave a Reply