kya kahen tujh se ham vafa kya hai
soch kuchh dil men puchhta kya hai
dil hai ye ya ki aabla kya hai
kyuun hai itna bhara hua kya hai
kaise kaise javan kiye barbad
ishq kya shai hai ye bala kya hai
dil ko dena tha de diya zalim
aur ham ne tira liya kya hai
gar raqabat tumhen nahin mujh se
phir ye a.ina dekhna kya hai
pahle rakh le tu apne dil par haath
phir mire ḳhat ko paḌh likha kya hai
ab vo ankhen nahin hain pahli si
sach kaho tum ko ho gaya kya hai
shauq-e-ashiq-kushi bhala hi sahi
rahm karna bhi par bura kya hai
kya kahen ham bura ki ḳhu hi nahin
par kaho tum hi ye jafa kya hai
jab ki gardan pe ḳhuun raha us ki
naam mat lo ki ḳhun-baha kya hai
meri aur aarzu ko tu puchhe
sochta huun ki mudda.a kya hai
jaane kya kya hua hai rizq-e-ḳhak
gul-o-lala ko dekhta kya hai
dil ajab chiiz hai to tum se aziiz
rahne bhi do muamla kya hai
aage aage hain para-ha-e-jeb
mujh ko darkar rahnuma kya hai
kam nigahi bhi shart-e-husn hai par
dekh tu ham men ab raha kya hai
qatl hote rahe hain ham se puchh
le ke shamshir sochta kya hai
pi ga.i ḳhuun zamin hazaron ki
muft phir shoḳhi-e-hina kya hai
donon aalam ko kyuun kiya pamal
naqsh-e-pa par ye naqsh-e-pa kya hai
ai ‘qalaq’ kyuun qalandari chhoḌi
ye aba kya hai ye qaba kya hai
Leave a Reply