Naseha Aaya Nasihat Hai Sunane Ke Liye

Poet

naseha aaya nasihat hai sunane ke liye

ya ki aaya hai yahan tere satane ke liye

aa ke lashe pe mire vo abdida gar hua

ye bahana ansuon ka hai bahane ke liye

tum jo kahte ho ki kya vo aisi jaldi mar gaya

kya hain barson chahiyen ik jaan jaane ke liye

kya hua gar maut aai hai vo aane ke liye

kya hua gar jaan gai hai vo bhi jaane ke liye

hai faqat parhez ye kah do mariz-e-ishq se

piine ko khun-e-jigar hai gham hai khane ke liye

munh men zahid ke bhi hain do daant hathi ki tarah

ik dikhane ke liye hai ek khane ke liye

kaun hai zer-e-falak phirta hai jo apni khushi

phir rahe hain sab jahan men ab-o-dane ke liye

pet ke gham ne kiya hai sab jahan ko muntashir

baap se beta juda hai ab-o-dane ke liye

jalva bakhsha vo mujhe tere rukh-e-pur-nur ne

tuur par muusa gaya tha jis ke paane ke liye

dekh kar aaya hai naseh kya jahannam ka azaab

hain faqat ye jahilon ka dil darane ke liye

rah gaya apna kaleja thaam jallad-e-falak

jab uthaya us ne khanjar khuun bahane ke liye

aab to dete ho khanjar ko magar ye soch lo

khuun mera chahiye us ko bujhane ke liye

vaada ashiq se na ho sachcha to jhuta hi sahi

chahiye kuchh to tasalli dil badhane ke liye

munh na dekha aish ka tadbir ham ne laakh ki

gham ghatane ke liye farhat badhane ke liye

jab kaha main ne ki kyuun baten banate ho bahut

hans ke bole baten hoti hain banane ke liye

ai dil-e-nadan nahin daulat dabane ke liye

kharch kar us ko vo hai khane khilane ke liye

jab kaha mera faqat hai ek bose ka saval

bole daulat husn ki kya hai lutane ke liye

hai bulaya ‘mashriqi’ ko tum ne jo pesh-e-raqib

kya nikala tha ye nuskha dil dukhane ke liye