Amjad Islam Amjad
jo din tha ek musibat to raat bhari thi
guzarni thi magar zindagi, guzari thi
savad-e-shauq men aise bhi kuchh maqam aa.e
na mujh ko apni ḳhabar thi na kuchh tumhari thi
larazte hathon se divar lipTi jaati thi
na puchh kis tarah tasvir vo utari thi
jo pyaar ham ne kiya tha vo karobar na tha
na tum ne jiiti ye baazi na main ne haari thi
tavaf karte the us ka bahar ke manzar
jo dil ki sej pe utri ajab savari thi
tumhara aana bhi achchha nahin laga mujh ko
fasurdagi si ajab aaj dil pe taari thi
kisi bhi zulm pe koi bhi kuchh na kahta tha
na jaane kaun si jaan thi jo itni pyari thi
hujum baḌhta chala jaata tha sar-e-mahfil
baḌe rasan se qatil ki mashq jaari thi
tamasha dekhne valon ko kaun batlata
ki is ke ba.ad inhi men kisi ki baari thi
vo is tarah tha mire bazuon ke halqe men
na dil ko chain tha ‘amjad’ na be-qarari thi
Leave a Reply