bazar-e-zindagi men jame kaise apna rang
hain mushtari ke taur na byopariyon ke dhang
muddat se phir raha huun khud apni talash men
har lamha lad raha huun khud apne khilaf jang
ik naam lauh-e-zehn se mitta nahin hai kyuun
kyuun akhir is pe vaqt chadhata nahin hai rang
us se alag bhi umr to kat hi gai magar
ek ek pal ke bojh se dukhta hai ang ang
shakh-e-nihal-e-zehn pe khvabon ke phuul the
hota na apna dast-e-junun kaash zer-e-sang
avaz ke hisar men dil ab bhi qaid hai
mange hai ab bhi pairahan-e-lafz har umang
kuchh tajraba bhi ab to zamane ka ho gaya
kuchh dal ke bachpane se bhi ham aa gae hain tang
kucha-ba-kucha phirte hain ab is tarah ‘bashar’
bhatke hai jaise haath se tuuti hui patang
Leave a Reply