dil silsila-e-shauq ki tash.hir bhi chahe
zanjir bhi avaza-e-zanjir bhi chahe
aram ki surat nazar aa.e to kuchh insan
nairang-e-shab-o-roz men tagh.ir bhi chahe
sauda-e-talab ko na tavakkul ke evaz de
ye shart to ḳhud ḳhaliq-e-taqdir bhi chahe
lazim hai mohabbat hi mohabbat ka badal ho
tasvir jo dekhe use tasvir bhi chahe
ik pal men badalte hain ḳhad-o-ḳhal lahu ke
aankh apne kisi ḳhvab ki ta.abir bhi chahe
lahja to badal chubhti hui baat se pahle
tiir aisa to kuchh ho jise naḳhchir bhi chahe
tasir se ḳhali to suḳhan nang hai ‘gauhar’
sha.er ko ata ho sanad-e-‘mir’ bhi chahe
Leave a Reply