vaah kya aalam ajab hai intizar-e-yar ka
naam hai didar-e-hasrat hasrat-e-didar ka
sair hai jannat ki sairon se tire ashiq ka dil
le ke jannat kya kare bhuka tire didar ka
zarra-e-dil men utar aae hazaron aftab
kya karishma hai khyal-e-jalva-gah-e-yar ka
badh chala tha teri ghaflat se bhi bar-e-bekasi
maut ne puchha mizaj aa kar tire bimar ka
jante hain ik jhalak men jan-o-dil mit jaenge
log munh takte hain tere talib-e-didar ka
dhyan men us ke do-alam se khincha baitha huun main
yaani ik naqsha khincha hai jazb-e-husn-e-yar ka
jis ko kahte hain muqaddar ashiqan-e-bad-nasib
hai vo ik bigda hua khaka mizaj-e-yar ka
Leave a Reply