Farooq Engineer
ye baat alag dil ko tiri yaad ne bandha
is said ko varna kahan sayyad ne bandha
kucha ye koi aur hi abad karega
saman jo ab ke dil-e-barbad ne bandha
is shahr ko ab chhoḌ ke kya ja.un ki mujh ko
roka hai kisi aah ne fariyad ne bandha
jo us ki talab hai vahi ab meri talab hai
kis sehr se mujh ko mire ham-zad ne bandha
hamvar hui raah na rasta hi khula hai
baazu se to ta.aviz bhi afrad ne bandha
ik koh-e-giran toḌ diya par nahin toḌa
paiman-e-vafa jab kisi farhad ne bandha
shagird ke ab sher se hota hai baramad
mazmun bahut pahle jo ustad ne bandha
‘faruq’ nazar ho ga.i markuz usi par
kya ḳhuub adaon se pari-zad ne bandha
Leave a Reply