lahu men ḳhak-e-shifa gundhne ki ḳhvahish thi
mujhe husain se kuchh mangne ki ḳhvahish thi
vo jis pisar ke jigar men utar ga.i barchhi
usi pisar ko javan dekhne ki ḳhvahish thi
miri talash mujhe karbala men le aa.i
mujhe zamin pe ḳhuda DhunDne ki ḳhvahish thi
jinhon ne luuTa tha maula husain ka lasha
unhin sinan se rida luTne ki ḳhvahish thi
main dauḌti rahi har tiir ke ta.aqub men
mujhe pidar ka gala chumne ki ḳhvahish thi
ḳhuda ke aḳhiri lashkar men bas bahattar the
ḳhuda ko karb-o-bala jitne ki ḳhvahish thi
mire husain mujhe hur samajh muafi de
mire husain mujhe lauTne ki ḳhvahish thi
bujha charagh to parkha junun bahattar ka
jinhen lahu se ziya banTne ki ḳhvahish thi
furat mashk men bhar ke ḳhiyam tak ghazi
na lauT paaya magar lauTne ki ḳhvahish thi
sinan ki nok pe dekho husain zinda hai
kaTa nahin hai jo sar kaTne ki ḳhvahish thi
salam ashk ki ḳhushbu men oḌh kar ‘rahib’
dayar-e-karb-o-bala bhejne ki ḳhvahish thi
Leave a Reply