ḳhamosh huun main lab pe shikayat to nahin hai
fariyad karun ye miri aadat to nahin hai
jo mauj-e-gham-o-dard uThi hai mire dil men
hangama to be-shak hai qayamat to nahin hai
shayad mujhe mil jaa.e mire dard ka darman
ummid sahi chain ki halat to nahin hai
fursat men mujhe yaad bhi kar lijiye ik din
ye arz mohabbat ki alamat to nahin hai
mil jaa.e sar-e-rah kisi moḌ pe koi
ik hadsa be-shak hai rifaqat to nahin hai
insaf jise haq ka taraf-dar kahen sab
is mulk men qaa.em vo adalat to nahin hai
kyuun ghar se nikalte hue Darte hain yahan log
is shahr men qanun-e-hifazat to nahin hai
allah raza par tiri raazi hi rahungi
ho shikva zaban par ye jasarat to nahin hai
abad raha dil men vahi ek ‘sabila’
ab ghair ko aane ki ijazat to nahin hai
Leave a Reply