raat ka pichhla pahar kaisi nishani de gaya
munjamid a.ankhon ke dariya ko ravani de gaya
main sadaqat ka alam-bardar samjha tha jise
vo bhi jab ruḳhsat hua to ik kahani de gaya
pahle apna tajziya karne pe uksaya mujhe
phir natija-ḳheziyon ko be-zabani de gaya
kyuun ujalon ki navazish ho rahi hai har taraf
kya koi bujhte charaghon ko javani de gaya
kyuun na is avara badal ko dua.en dijiye
jo samundar ko ḳhalish sahra ko paani de gaya
Leave a Reply