Ahmad Ashfaq
jitni ham chahte the utni mohabbat nahin di
khvab to de diye us ne hamen mohlat nahin di
bikta rahta sar-e-bazar kai qiston men
shukr hai mere khuda ne mujhe shohrat nahin di
us ki khamoshi miri raah men aa baithi hai
main chala jaata magar us ne ijazat nahin di
ham tire saath tire jaisa ravayya rakhte
dene vaale ne magar aisi tabiat nahin di
mujh se jo tang hua main ne use chhod diya
us ko khud chhod ke jaane ki bhi zahmat nahin di
ham the mohtat taalluq men tavazun rakkha
pas-e-ulfat raha had-darja aqidat nahin di
jis qadar tuut ke chaha use ham ne ‘ashfaq’
us sakhi ne hamen utni bhi to nafrat nahin di
Leave a Reply