Saurabh Shekhar
meri tujh se kya Takkar hai
main ik shai tu saudagar hai
ḳhvabo tum ahista aana
meri niind ka pul jarjar hai
ghafil rahne do bachchon ko
phir to aage Dar hi Dar hai
dukhiyaron ki is basti ke
har ghar men ik puja-ghar hai
shaam men din tabdil hua ab
ab har saaya qad-avar hai
achchhe muuD men hai vo dil ki
kahne ka achchha avsar hai
haath milao ahl-e-mohabbat
nafrat kaafi taqat-var hai
sach mat bolo us pagal se
us ke hathon men patthar hai
ghibat ki is ab-o-hava men
‘saurabh’ ka rahna dubhar hai
Leave a Reply