Hijab Abbasi
main akasr sochti huun zindagi ko kaun likkhega
na main likkhun to phir is bebasi ko kaun likhega
bahut masruf hain ahl-e-jahan harza-sarai men
ab ashob-e-sukhan men be-hisi ko kaun likkhega
kai sadiyan guzarin manzilon ke khoj men phirte
to phir mere siva is gumrahi ko kaun likkhega
ham is shahr-e-jafa-pesha se kuchh ummid kya rakkhen
yahan is hav-hu men khamushi ko kaun likkhega
use fursat nahin sahil, samundar, mauj likhne se
pareshan huun miri tishna-labi ko kaun likkhega
‘hijab’ is shahr-e-na-pursan men sab jhagda ana ka hai
surur-e-khud-parasti men khudi ko kaun likkhega
Leave a Reply