poet

Sip Mutthi Mein Hai Aafaq Bhi Ho Sakta Hai

siip mutthi men hai afaq bhi ho sakta hai

aur agar chahun to ye khaak bhi ho sakta hai

ye jo maasum sa Dar hai kisi bachche jaisa

aise halat men saffak bhi ho sakta hai

aao us tisre nukte pe bhi kuchh ghaur karen

ham jise juft kahen taaq bhi ho sakta hai

vajd men raqs to be-khauf kiya jaata hai

ho agar ishq to bebak bhi ho sakta hai

hijr nasur hai chup-chap hi jhelo is ko

ah-o-zari se khatarnak bhi ho sakta hai

ye jo sarsabz sa lagta hai umidon ka shajar

rut badalne pe ye khashak bhi ho sakta hai

to abhi bhej de us paar se rahmat koi

main ye sunti huun karam Daak bhi ho sakta hai

vo jo koson tujhe phaila hua aata hai nazar

vo samundar miri poshak bhi ho sakta hai

ye siyah-bakht use DhunDne lag jaaen agar

un ko phir nuur ka idrak bhi ho sakta hai

main jo mitti se khuda aur banana chahun

asman mere liye chaak bhi ho sakta hai

kyuun na ‘injil’ dobara se utari jaae

koi isai ki tarah paak bhi ho sakta hai

More Poems

Leave a Comment