Masjid

Akhtar Ul Iman

duur bargad ki ghani chhanv men khamosh o malul

jis jagah raat ke tarik kafan ke niche

maazi o haal gunahgar namazi ki tarah

apne amal pe ro lete hain chupke chupke

ek viran si masjid ka shikasta sa kalas

paas bahti hui naddi ko taka karta hai

aur tuuti hui divar pe chandol kabhi

giit phika sa koi chhed diya karta hai

gard-alud charaghon ko hava ke jhonke

roz mitti ki nai tah men daba jaate hain

aur jaate hue suraj ke vidai anfas

raushni aa ke darichon ki bujha jaate hain

hasrat-e-sham-o-sahar baith ke gumbad ke qarib

in pareshan duaon ko suna karti hai

jo tarasti hi rahin rang-e-asar ki khatir

aur tuuta hua dil thaam liya karti hai

ya ababil koi amad-e-sarma ke qarib

us ko maskan ke liye dhund liya karti hai

aur mehrab-e-shikasta men simat kar pahron

dastan sard mumalik ki kaha karti hai

ek budha gadha divar ke saae men kabhi

uungh leta hai zara baith ke jaate jaate

ya musafir koi aa jaata hai vo bhi dar kar

ek lamhe ko thahar jaata hai aate aate

farsh jarob-kashi kya hai samajhta hi nahin

kal-adam ho gaya tasbih ke danon ka nizam

taaq men shama ke aansu hain abhi tak baaqi

ab musalla hai na mimbar na muazzin na imaam

aa chuke sahab-e-aflak ke paigham o salam

koh o dar ab na sunenge vo sada-e-jibrail

ab kisi kaabe ki shayad na padegi buniyad

kho gai dasht-e-faramoshi men avaz-e-khalil

chand phiki si hansi hans ke guzar jaata hai

daal dete hain sitare dhuli chadar apni

is nigar-e-dil-e-yazdan ke janaze pe bas ik

chashm nam karti hai shabnam yahan aksar apni

ek maila sa akela sa fasurda sa diya

roz rasha-zada hathon se kaha karta hai

tum jalate ho kabhi aa ke bujhate bhi nahin

ek jalta hai magar ek bujha karta hai

tez naddi ki har ik mauj talatum-bar-dosh

chikh uthti hai vahin duur se faani faani

kal baha lungi tujhe tod ke sahil ki quyud

aur phir gumbad o minar bhi paani paani