be-saharon ka intizam karo
yaani ik aur qatl-e-am karo
ḳhair-ḳhvahon ka mashvara ye hai
Thokaren khaao aur salam karo
dab ke rahna hamen nahin manzur
zalimo jaao apna kaam karo
ḳhvahishen jaane kis taraf le jaa.en
ḳhvahishon ko na be-lagam karo
mezbanon men ho jahan an-ban
aisi basti men mat qayam karo
aap chhaT ja.enge havas vaale
tum zara be-ruḳhi ko aam karo
DhunDte ho giron paḌon ko kyuun
uḌne valon ko zer-e-dam karo
dene vaala baḌa.i bhi dega
tum sama.i ka ehtimam karo
bad-dua de ke chal diya vo faqir
kah diya tha ki koi kaam karo
ye hunar bhi baḌa zaruri hai
kitna jhuk kar kise salam karo
sar-phiron men abhi hararat hai
in jiyalon ka ehtiram karo
saanp aapas men kah rahe hain ‘hafiz’
astinon ka intizam karo
Leave a Reply