ham ki chehre pe na laa.e kabhi virani ko
kya ye kaafi nahin zalim tiri hairani ko
kar-e-farhad se ye kam to nahin jo ham ne
aankh se dil ki taraf moḌ diya paani ko
shisha-e-shauq pe tu sang-e-malamat na gira
aks-e-gul-rang hi kaafi hai giran-bani ko
daman-e-chashm men taara hai na jugnu koi
dekh ai dost miri be-sar-o-samani ko
tu ruke ya na ruke faisla tujh par chhoḌa
dil ne dar khol diye hain tiri asani ko
haan mujhe zabt hai sauda hai jinnon hai shayad
de lo jo naam bhi chaho miri nadani ko
jis men mafhum ho koi na koi rang-e-ghazal
‘sad’ ji aag lage aisi zaban-dani ko
Leave a Reply