ruki ruki si shab-e-marg khatm par aai
vo pau phati vo nai zindagi nazar aai
ye mod vo hai ki parchhaiyan bhi dengi na saath
musafiron se kaho us ki rahguzar aai
faza tabassum-e-subh-e-bahar thi lekin
pahunch ke manzil-e-janan pe aankh bhar aai
kahin zaman-o-makan men hai naam ko bhi sukun
magar ye baat mohabbat ki baat par aai
kisi ki bazm-e-tarab men hayat batti thi
umid-varon men kal maut bhi nazar aai
kahan har ek se insaniyat ka baar utha
ki ye bala bhi tire ashiqon ke sar aai
dilon men aaj tiri yaad muddaton ke baad
ba-chehra-e-mutabassim ba-chashm-e-tar aai
naya nahin hai mujhe marg-e-na-gahan ka payam
hazar rang se apni mujhe khabar aai
faza ko jaise koi raag chirta jaae
tiri nigah dilon men yunhi utar aai
zara visal ke baad aaina to dekh ai dost
tire jamal ki doshizgi nikhar aai
tira hi aks sarishk-e-gham-e-zamana men tha
nigah men tiri tasvir si utar aai
ajab nahin ki chaman-dar-chaman bane har phuul
kali kali ki saba ja ke god bhar aai
shab-e-‘firaq’ uthe dil men aur bhi kuchh dard
kahun ye kaise tiri yaad rat-bhar aai
Leave a Reply