kahan zamin ke za.iif ziine pe chal rahi hai
ye raat sadiyon se mere siine pe chal rahi hai
ravan hai mauj-e-junun pe ehsas ka safina
aur ek tahzib is safine pe chal rahi hai
ḳhumar-e-ḳhvab-e-sahar ye dil aur teri yaden
hava dabe paanv abgine pe chal rahi hai
main mar gaya to ḳhabar nahin un ka kya banega
dukan-e-yaran to sirf kiine pe chal rahi hai
guzar chuka hai tiri juda.i ka saneha bhi
hamari dhaḌkan na.e qarine pe chal rahi hai
Leave a Reply