dhyan men aa kar baith gae ho tum bhi naan
mujhe musalsal dekh rahe ho tum bhi naan
de jaate ho mujh ko kitne rang nae
jaise pahli baar mile ho tum bhi naan
har manzar men ab ham donon hote hain
mujh men aise aan base ho tum bhi naan
ishq ne yuun donon ko aamez kiya
ab to tum bhi kah dete ho tum bhi naan
khud hi kaho ab kaise sanvar sakti huun main
aine men tum hote ho tum bhi naan
ban ke hansi honton par bhi rahte ho
ashkon men bhi tum bahte ho tum bhi naan
meri band ankhen tum padh lete ho
mujh ko itna jaan chuke ho tum bhi naan
maang rahe ho rukhsat aur khud hi
haath men haath liye baithe ho tum bhi naan
Leave a Reply