pukarta huun ki tum hasil-e-tamanna ho
agarche meri sada bhi sada-ba-sahra ho
jahan tumhara hai hoga vahi jo tum chaho
mujhe bhi chahne do kuchh agar to phir kya ho
jahan o ahl-e-jahan ko kisi se kaam nahin
mire qarib to aao ki tum bhi tanha ho
zamana madfan-e-ayyam hai ḳhamosh raho
na jaane kaun hamari sada ko sunta ho
bharam khula hai to aise har ik ko dekhta huun
ki jaise main ne kabhi aadmi na dekha ho
tira karam hai ki men tere dam se jiita huun
mira nasib ki tu mere dam se rusva ho
tire ḳhayal men gum ho ke tai kiye main ne
vo marhale ki jahan mauj abla-pa ho
saza-e-zist qayamat sahi magar ham log
vo zinda hain jinhen har roz roz-e-farda ho
dhaḌakte dil ki sada bhi ajiib shai hai ‘zafar’
ki jaise koi mire saath saath chalta ho
Leave a Reply