Shiv Om Misra Anvar
badan ke paas ḳhushi ki asaas ho kar bhi
rakha hai gham se ta.alluq udaas ho kar bhi
zalil jab se kiya hai amiir logon ne
nahin vo mangta kuchh bhuuk pyaas ho kar bhi
na kam-kaj na roTi so chal paḌe paidal
qadam ruke hi kahan itni yaas ho kar bhi
hui hai rang-e-mohabbat men titliyon ki numud
badan ne dekh liya bad-havas ho kar bhi
ghurur toḌa hai ravan ka mere angad ne
hila sake na jo pa ko pachas ho kar bhi
asar men saara zamana vaba ke hai lekin
gira na hausla ḳhauf-o-hiras ho kar bhi
kisi ki mast-nigahi ne kar diya be-ḳhud
lagaya us ko gale na-shanas ho kar bhi
yuun to guzarte hai achchhe bure hazaron ḳhayal
milega kya tumhen ‘anvar’ udaas ho kar bhi
Leave a Reply