Abdul Wahab Sukhan
patthar tamam shahr sitamgar ke ho gae
jitne the aaine vo mire ghar ke ho gae
shayad ki ye zamana unhen pujne lage
kuchh log is khayal se patthar ke ho gae
mehvar se un ko khinch na paai koi kashish
shauq-e-tavaf men jo tire dar ke ho gae
vo apne la shuur se hijrat na kar saka
mere irade saat samundar ke ho gae
saffak mausamon ne ajab sazishen rachin
tukde hava ke hathon gul-e-tar ke ho gae
meri bulandiyon pe thi jin ki nazar ‘sukhan’
main khush huun vo mere barabar ke ho gae
Leave a Reply