Siddique Mujibi
honTon pe suḳhan a.ankhon men nam bhi nahin ab ke
is tarah vo bichhḌa hai ki gham bhi nahin ab ke
ḳhud ko dil-e-sarkash ne bhi rakkha na kahin ka
jiine pe raza-mand to ham bhi nahin ab ke
tanha hain to darpesh hain ḳhatrat-e-safar aur
yuun be-sar-o-saman yahan kam bhi nahin ab ke
kya kahiye ki jo munh men zaban bhi nahin apni
afsos ki hathon men qalam bhi nahin ab ke
be-rahm juda.i ka sabab bhi nahin ma.alum
ik-guna ta.alluq ka bharam bhi nahin ab ke
kya jaane ‘mujibi’ dil-e-qatil men hai kya aaj
mahzar men koi jurm raqam bhi nahin ab ke
Leave a Reply