marhala tai koi be-minnat-e-jada bhi to ho
gham baḌhe bhi to sahi dard ziyada bhi to ho
aisi mushkil to nahin dasht-e-vafa ki tasḳhir
sar men sauda bhi to ho dil men irada bhi to ho
zehn ka mashvara-e-tark-e-talab bhi bar-haq
zehn ki baat qubul-e-dil-e-sada bhi to ho
kahin badal kahin suraj kahin saaya kahin dhuup
mire ma.abud tira koi labada bhi to ho
pyaar men kam to nahin kam-nigahi bhi us ki
haan tunak-zarfi-e-ehsas kushada bhi to ho
ashiqi sarmad-o-mansur se kuchh ḳhaas nahin
mast lekin koi be-zahmat-e-bada bhi to ho
zarf-e-iza-talabi gham bhi parakh len ‘gauhar’
us se ik roz na milne ka irada bhi to ho
Leave a Reply