Sang-e-dar Ban Kar Bhi Kya Hasrat Mere dil Mein Nahin

sang-e-dar ban kar bhi kya hasrat mire dil men nahin

tere qadmon men huun lekin teri mahfil men nahin

rah-e-ulfat ka nishan ye hai ki vo hai be-nishan

jaada kaisa naqsh-e-pa tak koi manzil men nahin

kho chuke ro ro ke ghar bahar ki saari kaenat

ashk kaise aankh men ab ḳhuun bhi dil men nahin

bazm-arai se pahle dekh o nadan dekh

kaun hai mahfil men teri kaun mahfil men nahin

puchhta hai aarzu ‘ahsan’ ki tu kya baar baar

tere milne ke siva koi havas dil men nahin

Leave a Comment