pahan ke pairhan-e-gul saba nikalti hai
siyahiyon ke jigar se ziya nikalti hai
kabhi to mujh ko bhi ehsas-e-ashnai de
vo raushni jo kaf-e-gul pe ja nikalti hai
main aankh band karun to bhi hai vahi manzar
vo ek shakl har ik ru pe aa nikalti hai
sarab-e-fahm se aage kahin hai bahr-e-murad
har ek manzil-e-dil naqsh-e-pa nikalti hai
kabhi jo khul ke karun baat apne aap se main
har ek aarzu gham-ashna nikalti hai
hujum-e-aks men chehra talash kaise karen
har ek shakl ehsas-e-khala nikalti hai
sarak rahe hain andhere har ek basti se
azab-e-abr se qurs-e-vafa nikalti hai
mire yaqin ki ghutan aur bhi badhe ‘nahid’
hava ho band to mauj-e-bala nikalti hai
Leave a Reply