kaTte hi Dor saans ki nam-o-numud ḳhaak
hona hai ek roz ye qasr-e-vajud ḳhaak
TuuTa kisi ka dil jo gira dusri taraf
mizan men paḌa tira raḳht-e-sujud ḳhaak
tajsim kar raha hai vo dast-e-kamal se
atish-parast dahriye muslim hunud ḳhaak
is mahfil-e-tarab men nahin chashni koi
dil men ramaq na ho agar bazm-e-surud ḳhaak
baḌhne lage hain char-su rasmon ke da.ere
Thokar laga ke paanv ki kar duun quyud ḳhaak
ye qaum un hi raston pe chal paḌi hai phir
jin par huiin thiin ek din ad-o-samud ḳhaak
siine men koi aag hai ‘arshad’ lagi hui
varna hamari aankh se uThta ye duud ḳhaak
Leave a Reply