Nazeer Akbarabadi
dil na lo dil ka ye lena hai na ikhfa hoga
is ko dil kahte hain bas lete hi charcha hoga
tum ko har aan udhar hovegi husn-arai
ham ko har lahza idhar zauq-e-tamasha hoga
ham bhi sau chaah se dekhenge tumhari janib
tum se bhi zabt-e-tabassum na phir asla hoga
juun hi ham dekhenge tum aur tabassum hoge
chaah ka ghuncha-e-sar-basta vahin va hoga
guftugu hovegi baham jo isharat ke saath
matn is ka bhi harifon men muhashsha hoga
paanv tak haath jo lavenge kisi uzr se ham
tadne valon men shor is ka bhi barpa hoga
jab ye taqrir suni us shah-e-khuban ne ‘nazir’
ham se dil le liya aur hans ke kaha kya hoga
Leave a Reply