abdul-ahad-saaz

Lafzon Ke Sahra Mein Kya Mani Ke Sarab Dikhana Bhi

lafzon ke sahra men kya maani ke sarab dikhana bhi

koi sukhan sahabi koi naghma nakhlistana bhi

ik muddat se hosh-o-khabar ki khamoshi raaij hai yahan

kaash dayar-e-asr men gunje koi sada mastana bhi

nape-tule ahang pe kab tak sambhal sambhal kar raqs karen

koi dhun divani koi harakat majnunana bhi

shahr se bahar kohsaron ke biich ye thahra thahra din

kitna apna sa lagta hai aaj dil-e-begana bhi

ek tilismi raah fasil-e-tan se navah-e-jan tak hai

jis ki khoj men kho jaao to mumkin hai pa jaana bhi

agahi maakus safar hai danish-gah ke raste ka

jis ka har jana-pahchana manzar hai an-jana bhi

bol vahi hain sur bhi vahi mizrab ki jumbish badle to

yas-o-alam ke taron men muzmar hai ek tarana bhi

hasil aur la-hasil par ab vaise bhi kiya ghaur karen

aur chhalakne vaala ho jab sanson ka paimana bhi

kitni aag kashakash kitni kitna tahammul hai darkar

‘saz’ koi asan nahin hai lafzon ko pighlana bhi

More Poems

Leave a Comment