karb ke shahr se nikle to ye manzar dekha
ham ko logon ne bulaya hamen chhu kar dekha
vo jo barsat men bhiga to nigahen utthin
yuun laga hai koi tursha hua patthar dekha
koi saaya bhi na sahme hue ghar se nikla
ham ne tuuti hui dahliz ko aksar dekha
soch ka ped javan ho ke bana aisa rafiq
zehn ke qad ne use apne barabar dekha
jab bhi chaha hai ki malbus-e-vafa ko chhu len
misl-e-khushbu koi udta hua paikar dekha
raqs karte hue lamhon ki zaban gung hui
apne siine men jo utra hua khanjar dekha
zindagi itni pareshan hai ye socha bhi na tha
us ke atraf men sholon ka samundar dekha
raat bhar khauf se chatkhe the sahar ki khatir
sub.h-dam khud ko bikharte hue dar par dekha
vo jo udti hai sada dast-e-vafa men ‘afzal’
usi mitti men nihan dard ka gauhar dekha
Leave a Reply