Phir Wo Be-Samt uDanon Ki Kahani Sun Kar

phir vo be-samt uḌanon ki kahani sun kar

so gaya peḌ parindon ki kahani sun kar

kya yahi ḳhvab ki ta.abir hua karti hai

uḌ ga.i niind bhi ankhon ki kahani sun kar

aable aise kabhi phuuT kar na ro.e the

jis tarah ro.e hain kanTon ki kahani sun kar

ham vo sahra ke musafir hain abhi tak jin ki

pyaas bujhti hai sarabon ki kahani sun kar

dard ki had se guzar kar to yahi hona tha

aankh pathra ga.i ashkon ki kahani sun kar

kashtiyan lauT to aa.i hain magar ik sahil

soch men Duuba hai maujon ki kahani sun kar

tum ne to sirf baharon men unhen dekha hai

tum bikhar jaoge phulon ki kahani sun kar

saare kirdar siyane the magar jhuTe the

log hairan the bachchon ki kahani sun kar

kitna asan tha bachpan men sulana ham ko

niind aa jaati thi pariyon ki kahani sun kar

un ko ma.alum tha chehron ki haqiqat kya hai

chup rahe aa.ine chehron ki kahani sun kar