Kya Wasl Ke Iqrar Pe Mujhko Ho KHushi Aaj

kyā vasl ke iqrār pe mujh ko ho ḳhushī aaj

is kī bhī ye sūrat hai kabhī kal hai kabhī aaj

vo haath meñ talvār liye sar pe khaḌe haiñ

marne nahīñ detī mujhe marne kī ḳhushī aaj

milnā jo na ho tum ko to kah do na mileñge

ye kyā kabhī parsoñ hai kabhī kal hai kabhī aaj

kyā baat hai chhuptī hī nahīñ baat hamārī

jo un se kahī thī vo raqīboñ se sunī aaj

surḳhī bhī hai āñkhoñ meñ qadam ko bhī hai laġhzish

chhup kar kahīñ ai ‘nūh’ zarūr apne pī aaj

Leave a Comment