Sufi

Ek Yaad So Rahe Ko Uthati Hai Aaj Bhi

ik yaad so rahe ko uThati hai aaj bhi

ḳhud jagti hai mujh ko jagati hai aaj bhi

ye kaisi mutriba hai jo chhup kar jahan se

dhime suron men raat ko gaati hai aaj bhi

sadiyan guzar gaiin jise duube hue yahan

us ko sada-e-shauq bulati hai aaj bhi

jis shahr-e-arzu ke nishanat miT gae

dil ki nigah phir vahin jaati hai aaj bhi

honTon pe baar baar zaban pherta tha jo

us qafile ki pyaas rulati hai aaj bhi

parbat ki choTiyon pe vo roti hui ghaTa

kis hadse pe niir bahati hai aaj bhi

bas ek hi bala hai mohabbat kahen jise

vo paniyon men aag lagati hai aaj bhi

har roz aa ke ḳhvab men pazeb ki sada

dhaḌkan hamare dil ki baḌhati hai aaj bhi

‘hasrat’ koi to kho gaya umr-e-aziz ka

jo nange paanv dauḌti jaati hai aaj bhi

More Poems

Leave a Comment