akhtar-azad-1

Kya Hasin Raat Hai Is Raat Se darte Kyun Ho

kya hasin raat hai is raat se darte kyuun ho

aa gae ho to mulaqat se darte kyuun ho

naam aata hai mira jab bhi kisi mahfil men

ye batao ki savalat se darte kyuun ho

dil lubhane ke bhi andaz hua karte hain

mast ankhon ke isharat se darte kyuun ho

kai barsat ke mausam hain miri ankhon men

aati jaati hui barsat se darte kyuun ho

log achchhon ko bhi duniya men bura kahte hain

kya kahega koi is baat se darte kyuun ho

zindagi milti hai insan ko jiine ke liye

muskurate raho sadmat se darte kyuun ho

zikr-e-mazi ke tasavvur se pareshan ho kar

zinda rahna hai to halat se darte kyuun ho

More Poems

Leave a Comment