rasm hi niind ki ankhon se uTha di ga.i kya
ya mire ḳhvab ki ta.abir bata di ga.i kya
asman aaj sitaron se bhi ḳhali kyuun hai
daulat-e-girya-e-jan raat luTa di ga.i kya
vo jo divar thi ik ishq-o-havas ke mabain
mausam-e-shauq men is baar gira di ga.i kya
ab to is khel men kuchh aur maza aane laga
jaan bhi daav pe is baar laga di ga.i kya
aaj divane ke lahje ki khanak raushan hai
us ki avaz men avaz mila di ga.i kya
aaj bimar ke chehre pe bahut raunaq hai
phir masiha.i ki afvah uḌa di ga.i kya
Leave a Reply