Kuldeep Kumar
ḳhamosh lahje men mujh se dalil karte hue
guzar gaya hai vo mujh ko zalil karte hue
use kaho ki zara rahm se vo pesh aa.e
laga.e tegh pe gardan pa Dhiil karte hue
tumhen ḳhabar hi nahin samne hi thi manzil
chala huun main hi ye rasta tavil karte hue
vo ek shaḳhs miri pyaas dekh kar aksar
barasne lagta tha ankhon ko jhiil karte hue
laḌega zehn muqaddame men us ki janib se
saham raha huun main dil ko vakil karte hue
Leave a Reply