karte hain chain baithe husn-o-jamal vaale
phirte hain maare maare kya kya kamal vaale
meri tarah se ek din bazar se jahan ke
javenge haath khali jitne hain taal vaale
dam de ke phansta hai ushshaq ke dinon ko
main janta huun tujh ko zulfon ke jaal vaale
mahshar ka maarka ho jis dam jahan ke andar
us din hamen bachana o lambi Dhaal vaale
bulbul hain tere ham bhi bagh-e-jahan ke andar
o gul se gaal vaale sumbul se baal vaale
tanha lahad ke andar honge gada ki surat
jitne hain is jahan men jah-o-jalal vaale
zulf-e-shab-e-judai teri buri bala hai
is ka khayal rakhna o lambe baal vaale
ashiq hain ham bhi tere abru ke aur rukh ke
ham ko bhi yaad rakhna badr-o-hilal vaale
bhule hain do-jahan ko sud-bud nahin kisi ki
jo jo hain is jahan men tere khayal vaale
sayyad ne bichhaya gulshan men dam-o-dana
sun gul-ezar vaale o khatt-o-khal vaale
meri tarah se ik din bazar se jahan ke
jaenge haath khali jitne hain maal vaale
mansur-o-qais-o-vamiq farhad-o-‘muntahi’ se
kya kya gae jahan se fazl-o-kamal vaale