Farhat Shahzad
apni ankhon men hasin ḳhvab saja.e rakkho
laakh tufan uThen sham.a jala.e rakkho
raat phir raat hai ik roz guzar ja.egi
sub.h ki aas aza.em men basa.e rakkho
ḳhvahish-e-dil ki hava tez bahut hai yaaro
aag pindar ki siine men jala.e rakkho
jitna chaho to har maat saho hans hans kar
fikr-e-mayus ḳhayalon se bacha.e rakkho
yuun zara der ko dil se hi lubha lete hain
baat to jab hai ki ta-umr lubha.e rakkho
tum ne sach bola hai maslub tumhen hona hai
apne kandhe pe salib apni uTha.e rakkho
gar ye chaho ki ayaan karb na ho siine ka
jan-e-‘shahzad’ nigahon se bana.e rakkho
Leave a Reply