ab to jo manzar-e-shadab nazar aata hai
aisa lagta hai koi ḳhvab nazar aata hai
is hasin shahr men har samt hai logon ka hujum
aur insan hai ki nayab nazar aata hai
kab talak jins-e-vafa shahr men arzan hogi
ab ye dariya bhi to payab nazar aata hai
gardish-e-vaqt ne aise bhi tarashe hain sarab
dasht-e-be-ab men girdab nazar aata hai
hone lagta hai tire qurb ka ehsas mujhe
chaudhvin shab ko jo mahtab nazar aata hai
teri angusht-e-hina.i ka jise lams mile
vo nagina baḌa ḳhush-ab nazar aata hai
us ki ḳhushbu se mo.attar mira angan hai ‘ra.is’
jagti aankh se ye ḳhvab nazar aata hai
Leave a Reply