Poet
ho iid ya moharram ham gham kiya karenge
do roza dahr-e-dun men matam kiya karenge
mazmun darhami ka gesu ke bandhenge ham
har dam mizaj apna barham kiya karenge
us harf-e-na-shunu ki furqat men chupke baiThe
ham apne dil se baten har dam kiya karenge
kanon tak us ke pahunche manind-e-zulf jab ham
sargoshiyan sarasar baham kiya karenge
vo zulf-o-ruḳh se apne kafur-o-mushk le kar
tayyar zaḳhm-e-dil ka marham kiya karenge
go talḳh vo kahenge lab-ha-e-shakkarin se
har dam dua magar ham ham-dam kiya karenge
go ḳhuun ka qatra qatra dil se ‘vaqar’ kam ho
lekin suḳhan suḳhan se ham zam kiya karenge
Leave a Reply