mizhgan pe aaj yaas ke moti bikhar gae
zulmat badhi jo raat ki taare nikhar gae
kaisi ziya hai ye jo munavvar hain bam-o-dar
su-e-falak ye kis ki fughan ke sharar gae
shikve hain asman se zamin se shikayaten
ilzam un ke jaur ke kis kis ke sar gae
mahfil men aai kis ki sada-e-shikast-e-dil
saaqi ke haath ruk gae saghar thahar gae
sina-figar phulon se khushbu nikal padi
shabnam ke ansuon se gulistan nikhar gae
uljhi thi jin men ek zamane se zindagi
kyuun ai gham-e-hayat vo gesu sanvar gae
Leave a Reply