shauq deta hai mujhe paigham-e-ishq
haath men labrez le kar jam-e-ishq
aap huun zauq-e-asiri se ḳharab
koi le jaa.e mujhe ta dam-e-ishq
ishtiyaq-e-sajda se betab huun
ai harim-e-kaba-e-islam-e-ishq
qais o vamiq se kahan ab ahl-e-dil
tha inhin logon se raushan nam-e-ishq
naash par farhad ke shirin ga.i
vo sitam-parvarda-e-alam-e-ishq
aur yuun karne lagi ro kar ḳhitab
ai vafa ki jaan ai nakam-e-ishq
tujh se raunaq-ashna hai sub.h-e-shauq
tujh se zinat-afrin hai sham-e-ishq
jaan de kar tu to chhuTa ranj se
rah ga.i main hi bala asham-e-ishq
tera marna ishq ka aghaz tha
maut par hoga mire anjam-e-ishq
‘vahshat’-e-vahshi ki tha sab se alag
ho gaya kya be-takalluf ram-e-ishq
Leave a Reply