Muntazir Firozabadi
na jaane ye kaisi hava ho ga.i hai
bujha ke charaghon ko vo so ga.i hai
nadi jo bahut bolti thi hamesha
samundar men gir ke vo chup ho ga.i hai
haan thi ḳhubsurat bala ki magar vo
kahan jaane us ki hansi kho ga.i hai
hamen raat dekhe hai majbur ho ke
rulane ko aa.i thi ḳhud ro ga.i hai
gali thi usi dil mohalle men meri
yahan ik imarat khaḌi ho ga.i hai
dua di thi us ne jo lambi umr ki
suno vo dua bad-dua ho ga.i hai
haqiqat ki duniya baḌi be-rahm hai
vo lauTegi laḌki abhi jo ga.i hai
haan rakha tha likh ke jo kahna tha us se
bahar ab ke aa.i to sab dho ga.i hai
meri raah men phuul hi phuul hain ab
use bone kanTe the kya bo ga.i hai
na.i ik ghazal likh ke laaya to tha main
yahin to rakhi thi kahan kho ga.i hai
Leave a Reply