mujh ko hona hai to darvesh ke jaisa ho ja.un
manzilen sab ke liye aur main rasta ho ja.un
kitna dushvar hai ik lamha bhi apna hona
us ko zid hai ki main har haal men us ka ho ja.un
main ne ankhon ko tiri ghaur se dekha hai bahut
ye to mumkin hi nahin hai ki main andha ho ja.un
jo hararat hai badan men vo tire lams ki hai
tu mujhe gar na chhue miTTi ka tuuda ho ja.un
is qadar lutf bikharne men mila hai mujh ko
main ne koshish hi nahin ki kabhi yakja ho ja.un
phir ye Darta huun ḳhuda jaane bhala kaisa ho
ji men aata hai kabhi apna bhi chehra ho ja.un
gha.ebana hi sahi mera ta.aruf ho jaa.e
main kahani ka kisi tarah se hissa ho ja.un
is tarah yaad tiri aa ke uchak le mujh ko
daf.atan bhiiḌ men chalte hue tanha ho ja.un
in tabibon ko ilaj-e-gham-e-dil kya ma.alum
tum ayadat ko chale aao to achchha ho ja.un
yuun hi miTTi men paḌa ek hunar huun main bhi
jauhari mujh ko parakh le to main hiira ho ja.un
tu nahin yaad nahin koi nahin main bhi nahin
aur kuchh aur main kuchh aur akela ho ja.un
Leave a Reply