kisi ki yaad rulae to kya kiya jaae
shab-e-firaq satae to kya kiya jaae
jo rafta rafta gham-e-intizar ki dimak
mire vajud ko khaae to kya kiya jaae
shab-e-firaq ho ya ho visal ka mausam
ye dil sukun na paae to kya kiya jaae
dikha ke chand sa chehra vo husn ka paikar
asiir apna banae to kya kiya jaae
sharab-noshi se main duur bhagta huun magar
koi nazar se bhulae to kya kiya jaae
mire ilaaj ko kitne tabib aae magar
dava bhi dard badhae to kya kiya jaae
sukun milta hai jis ki nigah se ‘afzal’
vahi nigah churae to kya kiya jaae