lutate hain vo bagh-e-ishq jaae jis ka ji chahe
gul-e-dagh-e-tamanna luut laae jis ka ji chahe
charagh-e-yas-o-hasrat ham hain mahfil men hasinon ki
jalae jis ka ji chahe bujhae jis ka ji chahe
kasi maashuq ki koi khata main ne nahin ki hai
satane ko zabardasti satae jis ka ji chahe
ba-hal shauq-e-shahadat men kiya hai ham ne khuun apna
hamare shauq se purze udaae jis ka ji chahe
do-alam men nahin ai yaar mujh sa shefta tera
mohabbat yuun jatane ko jatae jis ka ji chahe
khushi o na-khushi mauquf hai apni hasinon par
hansae jis ka ji chahe rulae jis ka ji chahe
sadaen surkh-rui deti hai ganj-e-shahidan men
lahu ka menh barasta hai nahae jis ka ji chahe
jo ho jaega parvana charagh-e-husn ka us ke
karega naam raushan lau lagae jis ka ji chahe
ajaib lutf hain ku-e-tavakkul ki faqiri men
khudai hai yahan dhuni ramae jis ka ji chahe
koi ghuncha na pahunchega tire husn-e-tabassum ko
sar-e-maidan chaman men muskurae jis ka ji chahe
jagah us shama-ru ne di hai parvanon ke lashkar ko
sar-e-maidan chaman main muskurae jis ka ji chahe
pasheman ghuncha-o-gul honge mere zakhm-e-khandan se
hanse ji chahe jis ka muskurae jis ka ji chahe
ata ki nahr-e-gulshan us ne apne ishq-bazon ko
ijazat di yahan nikhre nahae jis ka ji chahe
khushi ho ho ke khud sayyad kahta hai anadil se
bahar aai hui hai chahchahae jis ka ji chahe
na dekhenge kisi betab ko vo aankh utha ke bhi
kaleje ko masose tilmilae jis ka ji chahe
marenge us pe kalma padh ke us ka jaan ham denge
khudai bhar men ham ko azmae jis ka ji chahe
ajab khushbu hai gul-daste men shauq-o-zauq ke us ki
karega vajd pairahan basae jis ka ji chahe
dua-e-maghfirat tum do utare qabr men koi
padho talqin tum shana hilae jis ka ji chahe
‘sharaf’ dam todte hain ik pari-ru ki judai men
ajab aalam hai un ka dekh aae jis ka ji chahe
Leave a Reply